غنوة الحب بقلم ندي زايد

ايه مالكو لو مش موافق يا بابا عادي انا ممكن مروحش 
ابتسملي بابا بحب 
.. لا ابدا يا حبيبة بابا روحو وبعدين اصلا زين استاذن مني قبل ما يقولك هاتي اللي نفسك فيه كله المهم تبقي مبسوطة 
وبعدين غمزتله بعيني 
.. طب ايه 
.. ايه 
.. يعني يا حاج الحاجات دي بفلوس يعني وكدا وكلك نظر 

ضحك بابا هو وماما بصوت عالي وبعدين مسكني من وداني 
.. يعني جايه عشان الفلوس مش عشان تستأذني مش كدا عموما يا ستي مش هينفع اديكي فلوس 
بصتله باستغراب فكمل 
.. بصراحة يا بنتي زين قلتله علي الفلوس واني هديكي فلوس تبقي معاكي كان ناقص ياكلني بيقول انك مراته وملزومة منه وانه مش صغير عشان تبقي علي ذمته وابوكي يصرف عليكي 
حقيقي في شئ في كلامه بسطني وقد ايه زين بيكبر في نظري اكتر من يوم ما جيت البيت دا بصيتله وانا مبسوطة ومركزتش بقول ايه 
.. جوزي اوي 
بصتلي ماما بخبث وهي بتسالني 
.. جوزك 
ساعتها ادركت اللي قلته واستأذنت بحرج وانا بجري علي اوضتي مش عارفه ايه اللي بيحصلي بس فكرة انه جوزي مبقتش مضايقاني زي الاول ..دخلت اوضتي قعدت اشتغل شويه علي ابحاثي لحد ما بليل اتجمعنا كلنا واتعشينا سوي وطلعت صليت ونمت عشان اصحي تاني يوم فايقة لان مروة قالتلي ان يومنا طويل ....
تاني يوم صحيت بدري صليت ووقفت قدام دولابي وانا محتارة هلبس ايه يليق بالطرحة اللي استلفتها من نغم حقيقي كلامه اثر فيا وهو فعلا محترمني من ساعه مجيت فحبيت اعمل كدا علي الاقل عشانه وكمان عشان مبقاش غريبه في البلد
وحد يستغربني ودي الافكار اللي سكت بيها قلبي عن اسألته الكتير 
لبست بنطلوني الاسود القماش وعليه بلوزة بيج بسيطة بحزام رفيع ولفيت الطرحة وحقيقي بصيت في المراية كتير حاسة شكلي حلو ....سمعت صوت الباب بيخبط
.. ادخلي يا نغم ونبي متعمليش فيها مؤدبة 
سمعت صوته هو وهو داخل 
.. بس انا مش نغم وانا طول عمري مؤ..
لاقيته سكت كان حاجة وقفته عن الكلام لفيت بوشي عشان اشوفه وحقيقي اتفاجئت لاقيتنا بنقول مع بعض في نفس الوقت 
.. ايه دا 
كان شكله حلو أوي اول مرة أشوفه لابس قميص وبنطلون كان لابس قميص اسود علي بنطلون اسود وكوتش ابيض وبجد شكله اتغير خالص لاقتني بقول من غير ما استوعب 
.. ايه الحلاوة دي 
ساعتها غمزلي بعنيه وهو بيدخل الاوضة 
.. عجبتك 
ساعتها ادركت اللي قلته ولفيت ادور علي شنطتي وكملت كلامي وانا مش مهتمه 
.. يعني اصلي

اتفاجئت اول مرة اشوفك بحاجة غير الجلبية معرفش انك بتلبس زي الشباب كدا عادي
.. انتي لسه متعرفيش حاجات كتير بس مقلتليش ايه الحلاوة دي 
بصتله كأني بتاكد انه يقصدني انا لاقيته بيكمل 
.. انتي حلوة على طول مش هنكر بس بجد شكلك حلو اوي 
ابتسمت في هدوء 
.. شكرا انك قدرتيني واحترمتي كلامي
بصتله كتير اوي بحاول استوعب هو بجد حلو كدا ولا هو بيحاول يبان انه حلو ماهو مش معقول انسان مفيهوش غلطه يعني ..خرجت من افكاري علي صوته وهو مادد ايده ليا عشان نمشي ..مديت ايدي بتوتر ونزلنا تحت لاقينا كله متجمع وحقيقي كلهم حبو شكلي اوي ودا بسطني وريحني نفسيا اوي لحد مالاقيت مريم الحرباية جاية من ورايا 
.. ايه دا يا غنوة دا انا معرفتكيش واصل كويس والله انك داريتي شعرك المنكوش 
.. اسمه كيرلي متسمعيش عنه ولا اه سوري دي حاجات يعرفوها البنات وبس 
لمحت مروة ونغم وهما بيضحكو وهي كانت لسه هترد بس زين قاطعهم اننا هنتاخر ولازم نمشي .. لقيتها مسكت زين من ايده بتوقفه وحقيقي ساعتها كان هاين عليا اجيبها من رقبتها 
.. انت هتخرج يازين دا انا كنت جايه اجعد معاك موحشكش جعادنا ولا ايه
قاطعنا صوت مرات عمي وهي بتقول 
.. ما تاخدها معاكو يازين يا ولدي دا حتي زوج مريم حلو جوي خليها تنجيلك بدلة زين وتشتريلها كام حاجة 
.. بيعجبني زوج مرتي اكتر يا اما ومعلش احنا متاخرين اما نعاود نبجي نجعد مع مريم هي كدا كدا فاضية وموراهاش حاجة بالاذن 
كمل كلامه وهو شاددني وخارجين علي برا وورانا مروة ونغم وحقيقي كان قلبي بيرقص علي
انه كبسها مريم الحرباية دي..
خرجنا وركبت جمبه في العربية وورا مروة ونغم واتمشينا في البلد فتحت ازاز العربية وقعدت اتفرج علي البلد بجد حلوة اوي ازاي مجتش هنا قبل كدا الشوارع نضيفة والزرع ف كل مكان وبجد انا كنت ظالمة المكان بابا كان عنده حق .. وصلنا عند مول كبير اوي متوقعتش اني الاقي زيه هنا وقالو اننا هنلف جوا ولو معجبناش هنشوف مكان تاني زين قال انه هيسبنا براحتنا ويخلص كام مشوار شغل ويرجعلنا تاني وسجل رقمه عندي وقالي لو احتاجت حاجة ارن عليه وقفته علي جمب وسالته وانا بفرك في ايدي 
.. اعمل ايه 
بصلي ياستغراب 
.. تعملي ايه في ايه 
.. يعني بص انا مش عاوزة اكلفك فقولي ميزانيه امشي عليها عشان الموضوع ميوسعش مني اوي مبحبش اكلف حد 
بصلي وابتسم 
.. مش متعود عليكي مكسوفه كدا 
.. متعودتش اطلب من حد فلوس حتي بابا بطلب في الضروري وبس وهو قال انك قايله ميدنيش 
.. عشان ملزومة